Samþykktir félagsins (drög)

Félagið heitir Samtak svf. og er samvinnufélag. Heimili þess og varnarþing er í Reykjavík.

Tilgangur félagsins er samfélagslegur rekstur af ýmsu tagi í almannaþágu, þar á meðal þróun, rekstur og hýsing hugbúnaðarlausna og annarrar stafrænnar þjónustu, ásamt annarri skyldri starfsemi. Félagið er ekki rekið í hagnaðarskyni.

Félagið starfar á Íslandi. Starfssvið þess er samfélagslegur rekstur og þjónusta í almannaþágu.

Félagsaðild er opin einstaklingum sem samþykkja tilgang félagsins og samþykktir þessar. Lögaðilum er ekki heimil aðild að félaginu, sbr. 1. mgr. 15. gr. laga nr. 22/1991. Umsókn um aðild telst afgreidd við staðfesta skráningu sem uppfyllir framangreind skilyrði og ber með sér skráð netfang samkvæmt 9. gr.; stjórn setur nánari reglur um afgreiðslu umsókna og getur synjað umsókn sem samræmist ekki tilgangi félagsins.

Félagsmaður getur sagt sig úr félaginu í rafrænni sjálfsafgreiðslu á mínum síðum félagsins og er það eina úrsagnarleiðin; úrsögnin tekur gildi 30 dögum eftir að hún er staðfest í sjálfsafgreiðslunni. Úrsögn sem berst eftir öðrum leiðum, svo sem með tölvupósti, bréfi eða símtali, telst ekki gild úrsögn og bindur félagið ekki. Kjósi félagsmaður að nýta ekki sjálfsafgreiðsluna getur hann jafnframt lokið aðild sinni með því að greiða ekki árlegt félagsgjald samkvæmt 5. gr., og fellur aðildin þá sjálfkrafa brott eins og þar segir. Þessar tvær leiðir eru einu leiðirnar sem félagsmaður hefur til að ljúka aðild sinni að eigin frumkvæði.

Stjórn getur vikið félagsmanni úr félaginu vinni hann gegn tilgangi þess eða vanefni skyldur sínar. Áður en til brottvikningar kemur skal félagsmanni að jafnaði birt skrifleg áminning á mínum síðum, þar sem tilgreint er í hverju brotið er fólgið og veittur hæfilegur frestur til úrbóta, nema um sérstaklega gróft brot sé að ræða. Hyggist stjórn víkja félagsmanni úr félaginu skal hún birta honum tilkynningu um fyrirhugaða brottvikningu á mínum síðum. Tilkynning um birtingu samkvæmt þessari grein skal jafnframt send á skráð netfang hans samkvæmt 9. gr. Félagsmaður á rétt á að koma á framfæri skriflegum andmælum eða óska eftir áheyrn stjórnar, hvort tveggja á mínum síðum sem er eina samskiptaleiðin í brottvikningarmálum, innan að lágmarki 14 daga frá birtingu tilkynningar um fyrirhugaða brottvikningu.

Ákvörðun um brottvikningu skal birt félagsmanni á mínum síðum með sama hætti. Ákvörðun um brottvikningu má skjóta til félagsfundar innan 30 daga frá birtingu hennar; sé það gert skal liðarins „brottvikning félagsmanns“ getið sérstaklega í fundarboði. Ákvörðunin telst endanleg þegar sá frestur er liðinn án þess að henni hafi verið skotið til félagsfundar, eða þegar félagsfundur hefur staðfest hana.

Aðildargjald er 100 kr. og greiðist í einu lagi við inngöngu í félagið með innskráningu á mínar síður og greiðslu í gegnum Blikk eða sambærilega greiðslutækni. Aðildargjald rennur í stofnsjóð og er inneign félagsmanns þar.

Inneign í stofnsjóði kemur til útborgunar við úrsögn samkvæmt 4. gr. Úrsögn telst jafngilda því að félagsmaður hætti þeirri starfsemi sem er grundvöllur þátttöku hans í félaginu, sbr. 3. mgr. 38. gr. laga nr. 22/1991, og skal inneignin greidd út án ástæðulausrar frestunar eftir að úrsögnin tekur gildi. Hið sama gildir sé félagsmanni vikið úr félaginu samkvæmt 4. gr.; brottvikning telst jafnframt jafngilda því að félagsmaður hætti þeirri starfsemi sem er grundvöllur þátttöku hans í félaginu, sbr. 3. mgr. 38. gr. laga nr. 22/1991, og skal inneignin greidd út án ástæðulausrar frestunar eftir að ákvörðun um brottvikningu er endanleg. Inneign kemur jafnframt til útborgunar við andlát félagsmanns, sbr. 1. mgr. 38. gr. laga nr. 22/1991. Að ósk félagsmanns kemur hún til útborgunar þegar hann hefur náð 70 ára aldri, þótt hann haldi áfram þátttöku í félaginu, og sömuleiðis að hans ósk flytjist hann af landi brott, enda gangi hann þá úr félaginu, sbr. 2. mgr. 38. gr. laga nr. 22/1991.

Auk aðildargjalds greiðir félagsmaður árlegt félagsgjald að fjárhæð 1 kr., sem rennur ekki í stofnsjóð og telst rekstrartekja félagsins. Félagsgjaldið greiðist eingöngu með innskráningu á mínar síður og greiðslu í gegnum Blikk eða sambærilega greiðslutækni, innan 30 daga frá skráningardegi félagsmanns ár hvert. Greiði félagsmaður ekki félagsgjaldið innan þess frests fellur félagsaðild hans sjálfkrafa brott, sbr. 2. mgr. 15. gr. laga nr. 22/1991, án sérstakrar ákvörðunar stjórnar og án þess að til komi málsmeðferð 4. gr. um brottvikningu. Slíkt brottfall aðildar telst jafngilda því að félagsmaður hætti þeirri starfsemi sem er grundvöllur þátttöku hans í félaginu, sbr. 3. mgr. 38. gr. laga nr. 22/1991, og kemur inneign hans í stofnsjóði þá til útborgunar, auk þeirra tilvika sem tilgreind eru hér að framan, og skal hún greidd út án ástæðulausrar frestunar.

Útborgun inneignar samkvæmt þessari grein fer fram með millifærslu á skráð reikningsnúmer félagsmanns. Félagsmanni ber að skrá reikningsnúmer sitt á mínum síðum og halda því réttu, og hafi það ekki þegar verið skráð skal hann gefa það upp í sjálfsafgreiðslu úrsagnar samkvæmt 4. gr. Frestun útborgunar sem stafar af því að rétt reikningsnúmer liggi ekki fyrir telst ekki ástæðulaus, og reiknast fresturinn frá því að réttar upplýsingar berast félaginu. Inneign félagsmanns fellur ekki niður þótt þessar upplýsingar vanti.

Félagsmenn bera ekki ábyrgð á skuldbindingum félagsins umfram greitt aðildargjald og inneign sína í stofnsjóði, sbr. 18. gr. laga nr. 22/1991.

Stjórn félagsins skipa þrír aðalmenn og þrír varamenn, kjörnir á aðalfundi til eins árs í senn. Stjórn kýs sér formann úr eigin röðum, fer með málefni félagsins milli félagsfunda og ræður starfsmenn þess. Meirihluti stjórnar ritar firma félagsins. Stjórn getur veitt prókúru.

Stjórn er heimilt að ráða framkvæmdastjóra og setja honum starfslýsingu. Framkvæmdastjóri annast daglegan rekstur og má ekki eiga sæti í stjórn félagsins. Sé enginn framkvæmdastjóri ráðinn fer stjórnin með daglegan rekstur.

Félagið er ekki deildaskipt.

Aðalfundur skal haldinn fyrir lok júní ár hvert. Félagsfundi skal boða með tölvupósti á það netfang sem félagsmaður hefur skráð á mínum síðum félagsins, með minnst 14 daga fyrirvara, og skal fundarefnis getið í fundarboði. Tölvupóstur er eina boðunarleið félagsins. Félagsmaður ber sjálfur ábyrgð á að skrá netfang sitt og halda því réttu í rafrænni sjálfsafgreiðslu á mínum síðum; fundarboð telst löglega birt félagsmanni þegar það hefur verið sent á skráð netfang hans, og félagsmaður sem ekkert netfang hefur skráð getur ekki borið fyrir sig að fundarboð hafi ekki borist honum.

Allir félagsmenn eiga rétt til fundarsetu, málfrelsis og tillöguréttar á félagsfundum. Félagsmaður sem óskar að leggja fram tillögu til endanlegrar afgreiðslu á aðalfundi skal leggja hana fram í rafrænni sjálfsafgreiðslu á mínum síðum eigi síðar en 21 degi fyrir fundinn, svo unnt sé að tilgreina hana í fundarboði; mál sem ekki hafa verið tilgreind í fundarboði er ekki unnt að taka til endanlegrar úrlausnar á fundinum, sbr. 26. gr. laga nr. 22/1991, en gera má um þau ályktun til leiðbeiningar fyrir stjórn.

Erindi félagsmanns til stjórnar samkvæmt samþykktum þessum, þar á meðal tillögur samkvæmt þessari grein, andmæli og beiðni um áheyrn samkvæmt 4. gr. og krafa um aukafund samkvæmt 2. mgr. 19. gr. laga nr. 22/1991, skulu lögð fram í rafrænni sjálfsafgreiðslu á mínum síðum og er það eina leiðin til að koma þeim að. Hver félagsmaður hefur pósthólf á mínum síðum þar sem félagið birtir honum tilkynningar og skjöl sem að honum er beint, og telst birting þar birting gagnvart honum.

Heimilt er að halda félagsfundi og stjórnarfundi rafrænt, að hluta eða öllu leyti, þar á meðal stofnfund félagsins, enda tryggi sá tæknibúnaður sem notaður er örugga auðkenningu þátttakenda, rétt þeirra til að taka til máls og greiða atkvæði og áreiðanlega skráningu á niðurstöðum atkvæðagreiðslu. Stjórn setur nánari reglur um framkvæmd rafrænna funda.

Á félagsfundum fer hver félagsmaður með eitt atkvæði án tillits til inneignar í stofnsjóði eða viðskipta við félagið.

Starfsmenn félagsins eiga ekki sérstakan rétt til stjórnarsetu umfram almenna félagsaðild.

Reikningsár félagsins er almanaksárið. Á aðalfundi skal kjósa skoðunarmann og varaskoðunarmann til eins árs í senn, sbr. 6. gr. laga nr. 22/1991. Félaginu er ekki skylt að kjósa endurskoðanda meðan það er undir stærðarmörkum 98. gr. laga nr. 3/2006 um ársreikninga, og skulu skoðunarmenn uppfylla hæfisskilyrði 97. gr. laganna.

Engin B-deild er starfrækt við stofnsjóð félagsins. Stofnun B-deildar krefst samþykktabreytingar, sbr. 15. gr.

Tekjuafgangi félagsins skal ráðstafað í varasjóð eða til starfsemi félagsins í samræmi við tilgang þess samkvæmt ákvörðun aðalfundar. Tekjuafgangi er ekki úthlutað til félagsmanna.

Samþykktum þessum verður aðeins breytt á aðalfundi, enda hafi breytingartillagna verið getið í fundarboði. Til samþykktar þarf tillaga að hljóta minnst 2/3 hluta greiddra atkvæða, sbr. 70. gr. laga nr. 22/1991, og jafnframt að enginn fundarmaður greiði atkvæði gegn henni; tillaga telst því aðeins samþykkt að hún sé samþykkt án mótatkvæða. Sitji fundarmaður hjá við atkvæðagreiðslu telst það hvorki atkvæði með tillögunni né gegn henni.

Feli breyting í sér röskun á réttarsambandi félagsmanna innbyrðis eða auknar skuldbindingar félagsmanna gagnvart félaginu þarf hún, auk framangreindra skilyrða, samþykki tveggja lögmætra félagsfunda í röð og stuðning minnst 2/3 atkvæðisbærra félagsmanna á hvorum fundi, sbr. 71. gr. laga nr. 22/1991. Fyrri fundurinn skal vera aðalfundur, en síðari fundurinn má vera hvaða löglega boðaði félagsfundur sem er, þó ekki haldinn fyrr en 30 dögum eftir þann fyrri.

Ákvörðun um slit félagsins skal tekin með sama hætti og samþykktabreyting, sbr. 15. gr., og fer um slitin að öðru leyti eftir lögum nr. 22/1991. Við slit skal fyrst greiða skuldir félagsins og því næst endurgreiða félagsmönnum inneignir í stofnsjóði. Eignum sem þá standa eftir skal ráðstafað til verkefna í almannaþágu sem samræmast tilgangi félagsins samkvæmt ákvörðun slitafundar, og skal þeim ekki úthlutað til félagsmanna.